2015年6月2日星期二

唔俾餐具叫人點食呀?

昨晚在一個煮食谷見到一個這樣的post
內容大致係講樓主去食肆買外賣
店員冇俾即棄餐具
樓主要求三套餐具店員卻要收取額外費用
樓主覺得好唔合理
所以要出post 鬧爆呢間食肆
佢認為:冇餐具叫人點食呀??!!

似乎, 買外賣要俾埋餐具在香港是理想不過的事情
唔俾餐具就唔知點開餐咁
但其實係咪真係要攞即棄餐具呢?

除非你突然要响街上/室外開餐
否則在一般情況下
買外賣無非都係返屋企或者公司食啫
响屋企食根本完全唔需要攞即棄餐具
公司pantry 亦應該會有刀叉提供
公司冇又或者唔想用公司公家餐具咪自己長期放一套响自己位囉
咁做有何難?

香港每日賣出咁多飯盒
如果人人攞少d即棄餐具
每日就會減少幾十萬甚至幾百萬對筷子刀义匙的消耗
你攞一套於你來説確是不多
但全部人攞一套
對地球來説
卻是千千萬萬倍的負荷與災難!

在英國買外賣
不論中餐、印度咖喱或是炸魚薯條
食肆或外賣店也不會提供即棄餐具
大家也習以為常
冇人會為此開post 鬧人
亦冇人會講'冇餐具叫人點食呀?'呢類貪自己方便而忽略環保之重要性的説話啊!


2015年5月24日星期日

紅油炒手汁

約二十多年前老爸老媽在香港某屋邨開過一間上海小店

不過我地唔係上海人
我地都係請師傅返黎煮啫

老媽是個要求甚高的人
所以請得返黎既師傅都有番咁上下水準
結果口碑一傳十(但可惜又未到十傳百😅)
蔡瀾先生、紅姑鍾楚紅等明人紅星也曾慕名光顧過呢!

在此要讚一讚鍾楚紅小姐
來買外賣佢係會自攜暖壺/外賣盒的
非常環保, 大家也應該如此啊!

回想起黎,可惜當時既叻豬對入廚尚未有興趣
捉到鹿都唔識脫角
竟然冇偷到師
真係人生之一大憾事也!

上海菜既紅油炒手相信大家都食過
老媽呢個唔知係咪當時响師傅處偷師返黎既紅油炒手汁,信我,堅係得!

做法非常簡單
材料有:蒜蓉、豉油、辣椒油、麻油、糖、五香粉(五香粉係叻豬改良自己加上去的)

份量,冇。因為真係非常隨意,鬼知你鐘意偏咸偏甜定偏辣咩?!

做法:所有材料撈勻煮一煮佢就攪掂
呢個汁用來點餃子、雲呑、或用來撈麵食都一樣咁正~

又或者打邊邊用來做醬汁亦得
不過最正都係用黎燒野食,冇錯,係BBQ 
將紅油炒手汁搽落d貢丸呀、腸仔呀、魚旦度然後再燒下佢,my god! 好味到爆燈!!!!!

最後,點都要提下大家
呢個汁好味
但由於有大量蒜蓉
食完個口會勁臭
不過佢既好味程度
係會令你甘願口臭
大家好自為之啦~












2015年5月22日星期五

趕頭趕命包餃子

朋友送來自家種的韮菜
除了用來煎蛋、整咸薄𦉘
用來整韮菜豬肉餃是常識吧!
餃子皮
非常易做
只需麵粉加水
然後搓搓搓
搓到麵團光滑便可
叻豬平時鐘意自己包餃子
但那天時間所限
唯有用模吸
不過也手痕自己包左幾隻呢~
包完用剩少少麵團
唔好嘥
碌薄佢切一條條做麵吧!
還有,叻豬唔用醋點餃子
改用老媽真傳既秘製紅油炒手汁
堅。好。味!!!!
下篇post 會教大家整呢個紅油炒手汁ok?
咁叻豬做咩包餃子包到趕頭趕命呢?
慢慢來,又再下一篇先講,嘻嘻~










2015年5月14日星期四

2015年5月5日星期二

知道叻豬係乜水未?

係咪等我出post 等到頸都長呢?

我其實差不多日日都有新post 出架!

不過不在此而已~

我响邊處出post 多?

咪我 Facebook 個人專頁囉!

名字叫'叻豬健康瘦身俱樂部'呀!

點解叫叻豬?

因為我英文名字叫 Natalie Chu 嘛~

你地睇左我個blog 咁多年

唔係唔知我叫 Natalie 呀嘛?

快d去Facebook 到 like '叻豬健康瘦身俱樂部'啦~

响嗰到繼續吹水兼交流瘦身心得啊!

2015年3月23日星期一

兒嬉的入學派位方法

[英國升中的派位方法]
常説香港讀書壓力大、功課多、競爭激烈
英國讀書好呀!冇壓力、冇功課、不論成績排名
但又有誰想到這會產生另一個問題呢?
小女兒被派入九流中學一事便是最佳証明。
經過和各中學、教育部門等等交涉之後
所得出的結論是在這個講求公平的英國社會裏,不論學生成績如何出眾還是如何低劣,只要你所居住的地方有一所中學在附近,無論那中學是好是壞,你願意入讀還是不願意入讀,基本上,你都冇得㨂。
填什麼第一、第二、第三志願,根本就是....多Q餘!
而學校怎樣計算收生的方法更加是得啖笑~
這不是我亂講的,學校已証實是用這樣的計算方法的!!!
怎樣計呢?原來....全靠.....一張地圖和一把間尺!
他們會在地圖上從你家至學校畫一條直線,誰的直缐越短,入讀機會便越大。
而直線中間是否有條河又或者是否有座高山都不緊要,總之條直線夠短便行,bloody hell!!! 兒嬉到呢~~
這便是學校在政府和教育部門的指引下認為最公平的方法了,此舉亦可以在數據上好看兼平均一點,不用所有成績好的學生偏向一間中學而令那些九流中學的數據長期處於劣勢低位之下...
究竟這是誰的雞腦想出來的?公平喎,其實比共產黨更共產! 比香港的假普選更加假囉!

#沉澱一下思緒,跑步發洩去

2015年3月19日星期四

署光來了~

用坐過山車也不足以形容我近來的心情....
由上星期煩惱小女兒被派入九流中學
到竟然收到一間私校通知.....
小女兒竟然....考到....獎學金!!!!
雖然獎學金只能cover 少數的學費
但起碼我多了一個選擇
而且是個更好的選擇
入讀私校絕對值得考慮
作為一個母親
我為我的小女兒感到十分的自豪!
不過話雖如此
我仍然會繼續爭取為妹妹入第一志願的中學
因為我覺得教育部門和中學都對成績優異的學
生欠缺一個交代
我仍然相信,我是會成功的
有理地堅持,是我的做人原則。